Heroes e heroínas
CATEGORÍAS RELACIONADAS
Micromitos 084: O rei Charlo
Nun documento de 1527 e noutro do s. XVII descríbese a «solta do paxaro» que se facía en Vilanova de Lourenzá. O costume que debeu durar até o s. XV consistía en que os veciños tiñan que cazar un paxaro chamado rei Charlo a principios de ano.
Os veciños xuntábanse nas datas previas para cazar un «paxaro rei chiquito do papo colorado», un carrizo o un paporrubio, e logo «preso cunha cinta nunha lanza e a lanza nos ombros» ían en procesión e presentábanllo ao abade, quen llelo agradecía con viño e pan trigo.
O abade cortáballe ao paxaro algunhas plumas cunha tesoira e, tras facerlles ver que podería facer con eles o mesmo, ceibábao en sinal de magnanimidade.
Despois, os veciños ían ao concello e escollían catro homes de entre os que o abade nomeaba dous alcaldes. Se non conseguisen cazar o «paxaro rei» ese día, o abade concedíalles ata Reis.
O costume puido chegar a Lourenzá canda os monxes bretóns no s. VI ou cos bieitos a partir do X, e ten relación coa vella crenza de dar morte simbólica ao rei no solsticio de inverno para favorecer a rexeneración da vida.
Serie: Micromitos
Publicación: Nós Diario, 26 de decembro de 2020.
Comparte en.
Imprimir.
