Seres míticos
CATEGORÍAS RELACIONADAS
Micromitos 039: Cabalos
Os cabalos, brancos ou negros, acuáticos, terrestres, de lume e aéreos, son animais simbolicamente moi importantes. Neles foxen, tras o desencantamento, as mozas encantadas. Son o animal preferido dos mouros —que os levan beber por camiños soterrados—, e a figura preferida para transformarse do diaño bulreiro e dalgunhas bruxas.
Ver un cabalo pantasma avisa de morte inminente, ou, incluso, tal o cabalo da fiaña, pode ser a propia Morte. Santiago, a Virxe, o Demo e outros personaxes viaxan en cabalos que deixan nos rochedos, tras dar brincos imposibles, a pegada perenne das ferraduras.
Hai cabalos máxicos que trotan á velocidade da luz, do vento ou do pensamento. Mesmo causan pavor os cabalos da Garda Civil que F. García Lorca retrata: “Os cabalos negros son, as ferraduras son negras”.
E cabalos negros son, segundo conta X. C. García Porral, os que montan os mouros do castro de Baroncelle, en Carboentes, Rodeiro. Escóitanos trotar pola noite e polo día vense as pegadas das ferraduras na lama das congostras, os valados desfeitos e as cancelas esmendrelladas.
© Antonio Reigosa. Serie: Micromitos Publicación: Nós Diario, 23 de outubro de 2020.
Comparte en.
Imprimir.
