Festas e mitoloxía relixiosa
CATEGORÍAS RELACIONADAS
Don Serafín, crego esconxurador
Don Serafín López del Río foi párroco de Santa Baia de Teilán, concello de Bóveda (Lugo). Era entendido en sacar espíritos do corpo e en facer rogativas para esconxurar o trono. As rogativas comezábaas o 15 de maio e seguían todos os domingos ata o 25 de xullo.
Son moitos os sucedidos que se contan do cura de Teilán.
O caso de Pura, unha muller que aínda vive en Bóveda, que cando era moza tomou un caramelo que lle meteu no corpo un espírito. De repente, enmudeceu e renegaba da igrexa e de todo o relacionado con ela, mesmo rexeitaba ao seu propio fillo e ao esposo. Nin catro homes podían con ela cando se enrabechaba. Deitábase coas botas postas e atadas, pois cría que así facíalle dano á persoa que lle dera o caramelo co espírito.
O cura de Teilán intentou sacarlle aquel espirito, ou demo, do corpo pero non foi capaz. Como non puido mandou que a levasen á Coruña, e alí curou e desde entón é unha persoa normal.
Outra vez houbo na Casa do Medio, en A Portaxe de Remesar, un rapaz chamado Arturo que tiña un demiño no corpo. O espírito falaba e aseguraba que quería saír do corpo do mozo pero que antes de facelo habíao de matar.
Levárono xunto de don Serafín e o crego púxose a esconxurar. Xusto no momento en que o demo saía para fóra do rapaz, atragantóuselle na gorxa e afogouno.
O rapaz morreu e don Serafín deixou de sacar espíritos do corpo da xente desde aquel día.
BIBLIOGRAFÍA
Comparte en.
Imprimir.
